Сопружниците Емилија и Стојче
Тоциновски се академски ликовни уметници, кои припаѓаат на
младата генерација сликари во современото македонско сликарство.
Со оваа изложба – циклусот Чајници, тие уште еднаш потврдуваат
дека се ликовни творци кои освоиле засебен естетски свет и ликовен
ракопис, со што ги предочуваат вредносните аспекти на своето
творештво.
Нивната мисловна ангажираност, бујната имагинација и
сензибилитет, како и истражувачката енергија и експресија
резултираат во автономни творби со содржина помеѓу слободата на
тематскиот слој и ликовната престава.
Тоа е свет на сликарски ансамбли со слоевита лексика, збиен и
сензибилен набој, хармонизирани колористички градации ритмично
избалансирани, со напати вметнати елементи од други техники /како
колаж и декупаж/.Оттука и основната градба на ова сликарство се
карактеризира со асоцијативно-симболичните содржини со модерен
ликовен израз, со интензивен и впечатлив колорит, благодарение на
нивното извонредно чувство да воспостават експресивен спој
помеѓу боите.
Тоа се дела кои се работени со многу конструктивна топлина и
љубов, дела работени лесно, чисто, со одмереност и искреност, со
рафинирани потези на минуциозна и педантна разработка, со
транспарентна хроматска усогласеност на колоритот. Тоа се дела со
различна мотивска содржина на стилизирани и флуидни форми кои
во меѓусебниот однос на предметот и просторот како и распоредот
на ликовните елементи упатуваат на врамнотежена, цврста и
компактна композиција.
Отука и основната порака на овие дела е искреноста, убавината,
радоста, страста , позитивните чувства и секако племенитоста кои
сите подеднакво кореспондираат предизвикувајќи возбуда и
естетска страст.
Во нивната голема љубов – уметноста, на сопствен начин ги
пресоздаваат човекот, животот и светот. Темите и мотивите со
нагласена поетика од симболи и со раскошот на боите ги
овековечуваат како ода на радоста, добрината и љубовта.
Дора Андова
No comments:
Post a Comment